Den INFPC organiséiert an Zesummenaarbecht mam Ministère fir Educatioun, Kanner a Jugend a mat de Beruffschamberen den 12. an den 19. Mee 2025 zwou Informatiounsveranstaltungen iwwer d'Bäihëllefen am Formatiounsberäich fir Privatpersounen.

Persounen, déi hir Kompetenzen ausbauen, hir Talenter stäerken oder de Beruff wiesselen an hir Karriär virundreiwe wëllen, hunn Usproch op Bäihëllefe fir d'Weiderbildung.

Dës Bäihëllefen, déi u verschidde Konditioune gebonne sinn, gi bereetgestallt a Form vu Spezialcongé (individuelle Formatiounscongé, Sproochecongé, Jugendcongé), Mesuren am Beräich vun der Aarbechtszäit (perséinlechen Amenagement vun der Aarbechtszäit, onbezuelte Formatiounscongé) oder spezielle Subsiden.

D'Informatiounsveranstaltunge fanne statt:

  • Méindes, den 12. Mee 2025 op Franséisch (18:00-19:00 Auer)
  • Méindes, den 19. Mee 2025 op Lëtzebuergesch (18:00-19:00 Auer)

an der Chambre des salariés (2 - 4 rue Pierre Hentges, L-1726 Luxembourg).

Si ginn als Presentiel-Veranstaltungen ugebueden an am Livestream iwwerdroen.

D'Participatioun ass gratis an d'Umeldung op www.infpc.lu/inscription-aides ass obligatoresch.

Méi Informatiounen: lifelong-learning.lu

Kontakt
INFPC
Mathis RIES
Chargé de communication
mathis.ries@infpc.lu 
T +352 46 96 12-218

Iwwer den INFPC
Den INFPC, den Nationalen Institut fir d'Entwécklung vun der berufflecher Weiderbildung, ass en Etablissement public ënnert der Tutelle vum Ministère fir Educatioun, Kanner a Jugend. Seng Missioun besteet doran, d'liewenslaangt Léiere bei allen Zilgruppen am Beräich vun der Formatioun ze fërderen, egal ob et sech ëm Salariéen, Leit op der Sich no enger Aarbecht, Formatiounsinstituter, Akeefer oder Prescripteure vu Formatiounen handelt.